" Ата, апамды урбаңызчы?" Панфилов районундагы форумда үй- бүлөлүк зомбулук сахналаштырылды

Кечээ, 27- октябрда Чүй облусунун Панфилов районунда өтүлгөн форумда зордук- зомбулуктун алдын алуу боюнча сахналаштырылган көрүнүштөр көрсөтүлдү. Бул тууралуу райондук ички иштер бөлүмүнөн билдирди.

Форум райондук ички иштер бөлүмүнүн демилгеси менен уюштулган.
Ага Кыргыз Республикасынын ИИМдин милициянын генерал-майору Э. Алиев атындагы Академиясынын кафедрасынын профессору, милициянын полковниги Азамат Абдырахманов, кафедранын профессору, милициянын капитаны Сагынбек Кадырбеков, райондун прокурору Акжол Мамытов, аким Бекмаат Масаидов, билим берүү бөлүмүнүн башчысы Талант Арыков жана социалдык коргоо органдарынын өкүлдөрү катышкан.

Форумда зордук-зомбулуктун алдын алуу боюнча окуучулар тарабынан даярдалган сахналаштырылган көрүнүштөр көрсөтүлүп, иш чара укук бузууларды болтурбоого, жарандардын укуктарын коргоого жана тиешелүү мамлекеттик органдардын өз ара кызматташуусун күчөтүүгө багытталган. "Зордук-зомбулуктун бардык түрлөрүнө каршы күрөшүүдө алдын алуу иштерин күчөтүү жана мекемелер аралык кызматташтыкты өнүктүрүү маанилүү.

Мындай иш-чаралар коомдук коопсуздукту камсыз кылууга, калктын укуктук сабаттуулугун жогорулатууга жана зордук-зомбулуктун алдын алууда өз натыйжасын берет" - деди райондук ички иштер бөлүмүнүн начальниги, милициянын полковниги Талгар Мамбетказиев.