Мурда шаарга караган кварталдын жашоочулары маршруттук каттамдын жоктугуна жана жолдун начардыгына нааразы

Жолубуз абдан начар, жамгыр, кар жааса чуңкурларга суу толот. Бул тууралуу Ош облусунун Кара-Суу районуна караштуу Манас айыл өкмөтүнүн 223-кварталынын жашоочулары билдиришти.

Алардын айтымында, жол маселесинен сырткары, маршруттук каттам жок. Эл 1 чакырым басып, негизги трассага чыгууга мажбур.

Жергиликтүү тургундардын бири 223-кварталдын Нуркамил Жумаев көчөсү өзгөчө начар акыбалга келгенин, жергиликтүү бийлик шагыл төгүү менен гана чектелип жатканын айтты.

Ал кошумчалагандай, жол начар болгону үчүн мурда каттаган №105 каттам аталган кварталга кирбей калган.