Нарын облусунун Ак-Талаа районунун Кара-Бүргөн айылындагы жергиликтүү аңчы тарабынан канчык карышкыр капканга алынды. Бул тууралуу аймактык кабарчы билдирди.
Маалым болгондой, аталган айылдагы жергиликтүү аңчы Келдибек Исмаилов Кулжа-Башат (Ала-Буга дарыясынын наркы өйүзү) чөлкөмүндө жүргөн 9 карышкырдын бирин капкан коюп кармап алгандыгы маалым болду. Видеодо көрүнгөндөй арткы бутунан капканга түшүп калган карышкыр таш ыргыткан аңчыга ыркырап айбат кылып, ал тургай уулуган.
"Ала-Буга дарыясынын наркы өйүзүндө карышкырлар абдан күч болуп жатат. Топоздорду деди, мамалактарын жеди. Жылкыны аябай деди. Жайлата жылкыдан төл алган жокпуз. Кулжа-Башат чөлкөмүнө 4-5 үйүр жылкы чыкиы эле, бир кулун алган жокпуз. Кулундун баарын "терип" кетти. Ошол жакта 9 карышкыр жүрөт дегендеринен, капкан койгом. Кудай жалгап канчык карышкыр түшүп калыптыр", - деди Келдибек Исмаилов.
