Нарын облусунун Ак-Талаа районунун Кара-Бүргөн айыл аймагына караштуу Ак-Чий айылынын мугалими мектеп көйгөйүн көтөрдү. Бул тууралуу аймактык кабарчы билдирди.
Маалым болгондой, 25-март күнү Жогорку Кеңештин депутаты жана район акими катышкан элдик жыйында, аталган айылдагы Мурзабек Балбаков атындагы орто мектебинин мугалими Медина Рыспаева мектепке байланышкан 3 көйгөйдү айтып чыкты.
"Биздин көйгөйүбүз айылда дагы, мектепте дагы спорт залыбыз жок. Жаштар бош убактысын туура пайдалануу, спорт менен алектенүү керек экендигин президентибиз баш болуп айтып жатышпайбы. Бирок, бизде спорт зал жок. Балдарыбыз, жаштарыбыз сыртка чыгып, башка жактын спорт залдарын ижарага алып ойноп келишет. Чындыгында, буга чейин айылыбыз өзгөчө кырдаалдар боюнча кызыл зонада болуп, эч бир курулушка руксат берилбей келген. Эми кызыл зонадан чыгарышты. Мындан тышкары, жергиликтүү бюджеттин эсебинен мектептин жанына кичи футбол аянтчасы курулган. Аянтча курулганы менен алды таш боюнча турууда. Алдына ковер салдырып берсеңиздер жакшы болот эле. Мындан тышкары, мектептин имаратында бала бакча дагы, фельдшердик-акушердик пункт иштеп келет. Эгер, айылга фельдшердик-акушердик пункт өзүнчө курулса, бала бакча кеңейип, кенже балдар тайпасы ачсак болор эле. Ушул көйгөйлөрдү чечип берсеңиздер", - деди М.Рыспаева.
--
Отправлено из Mail для Android
