Нарын облусунун Ак-Талаа районунун Тоголок Молдо айыл аймагына караштуу Кара-Ой айылынын дыйкандары сугат суу тартыштыгын айтып чыгышты. Бул тууралуу аймактык кабарчы билдирди.
Айыл тургуну Ильич Ташматов Боор-Албас чөлкөмүнө сугат суу сактагычын куруп берүү сунушун айтты.
"Биздин Боор-Албас капчыгайынан булактан бир кулак суу агып келет. Ал булактын суусунан айылдын таза суусуна дагы алабыз. Ошол суудан Көк-Ой чөлкөмүнө сугат суусу келет. Ал сууну башынан чоңойтууга дагы болбойт. Бир кулак суу сугат учурунда жетпейт. Ошол жердин башында мезгилдик жөнгө салуу бассейн (БДР) куруп беришсе жакшы болмок. Учурда суу жөн эле ашып кетүүдө. Эгер, мезгилдик суу топтоочу жайы курулса, сууну топтоп алсак, сугат маалында суу көп болмок. Андан тышкары, айылдагы бакчаларды сугарууга дагы жетиштүү келмек", - деди ал.
Ал эми дагы бир айыл тургуну Эркинбек Бугубаев Нарын дарыясынан насос аркылуу суу алуу зарылдыгын жана канал курууну сунуштады.
"Биз сугат суунун тартыштыгынан аябай эле кыйналып жатпайбызбы. Жаныбызда Нарын дарыясы лакылдап агып жатат. Нарын районунун Куланак, Учкун айылдарында суу насостук станциясы аркылуу сунат сууларын алып жатышат. Бизде деле ошого ылайыктуу жерлер бар. Союз учурунда насостук станция куруп, сугат суусун алып келүү үчүн канал курууга долбоор бар экен. Эгер, ошол долбоорду кайра карап чыгып, канал куруп берсеңиздер 6 миң гектар жерди суу басат эле. Азыр эми насостун түрү чыгып жатат. Бул эми келечек үчүн. Калктын жыл сайын өсүп жатат. Эгер, бул ишке ашып калса Кызыл-Белес, Тоголок Молдо жана Жаңы-Талап айылына дагы сугат суусу кенен келип калмак", - деди Э.Бугубаев.
--
Отправлено из Mail для Android
