Таш-Көмүр шаарынын жашоочуларына бир күндө эки саат гана суу берилет. Айрым учурда көп кабаттуу үйлөрдүн 4-5 кабаттарына суу чыкпай жашоочуларды убайымга салат. Мындай көрүнүшкө тургундар да көнүп калгандай, себеби алар үйүндөгү бар идиштерин суу толтуруп, кир, идиш жууганы, тамак-ашка а түгүл дааратканага да ошол сууну пайдаланышат.
Таш-Көмүр шаарына караган Кызыл-Алма кичи шаарчасында 30га чукул көп кабаттуу үй бар, дээрлик алардын баарында ушул көйгөй бар. Аталган райондо 20 жылдан ашык убакыттан бери жашаган Шарапат Суранкулова Нарын дарыясынын жээгинде жашап, ичүүчү суу жок дегени акылга сыйгыс нерсе дейт.
