Жумгал районунда жаштар борбору жана “жумгал.кж” маалымат сайты ачылды. Ачылыш аземге жергиликтүү бийлик өкүлдөрү жана демөөрчүлөр катышты. Райондун жигердүү жаштары демилге көтөрүп, айыл жаштарын бириктирүү жана жаштарды коомдук иштерге тартуу максатында жаштар борборун ачты. Жаштар үйү Чаек айылындагы райондук администрациянын имаратынан орун алып, керектүү жабдыктар менен камсыздалган. Ал эми демилгелүү жаштар былтыр “Жумгал.кж” маалымат порталын да ачып, ишке киргизди. Сайтта жаш журналисттер иштеп, райондо болгон жаңылыктарды интернетке чыгарып турат. Жаштар борбору учурда акысыз бир катар кызматтарды аткарып, жаштарга юридикалык жана социалдык кеңештерди берип, коомдук иш чараларды, акция жана марафондорду уюштуруп келет. Жумгал жаштары борборунда «Жумгал.kg» бий студиясы, тамада борбору жана фотостудиясы да иш алып барат.
