-
Категория
Хоккей боюнча Жумгал районунун ачык биринчилиги аяктады. Жалпы байге фонду 500 миң сомду түзгөн бул мелдеште Кыргызстандын курама командасына мыкты оюнчулар тандалып алынды.
Эки күнгө созулган бул биринчиликке жергиликтүү төрт командадан тышкары Нарын шаарынын жана Кочкор районунун хоккейчилери катышты. Эки тайпада өткөрүлгөн таймашта Чаектин "Шортон" жана "Кызыл жылдыз", Нарындын "Ала тоо" жана Кочкордун "Ормон хан" клубдары баш байге үчүн күрөшкө укук алышты. Алардын өз ара беттешүүлөрүндө талаа ээлерине тең келээрлик эч ким болбоду. Натыйжада "Ала тоо" менен "Ормон хан" үчүнчү орун үчүн күрөшүп, мында ийгилик фортунасы нарындыктарга жылмайды. Алар кочкорлук атаандаштарын 3:2 эсебинде утушту. Ал эми биринчи орунду финалдык оюнда "Кызыл жылдыз" командасын ири 7:1 эсебинде жеңген Чаектин Шортону ээледи. Ошондой эле ушул мелдеште "мыкты оюнчу" деп табылган хоккейчилерге да акчалай сыйлыктар ыйгарылды.
Биринчиликтин башкы калысы Рахат Абышев: "Командалардын көбөйгөнү, хоккейдин өнүккөнүн көргөзүп жатат. Экинчиден ошол хоккейчилердин жекече өсүп жатканын кабарлайт. Анткени оюнчулар аябай көбөйүп, эң мыктылары гана ойноп жатат."
Жумгал районунда уюштурулган ушул биринчиликтин жыйынтыктары менен өлкөнүн курама командасынын составы толугу менен аныкталды. Эми алар 24-февралдан 1-мартка чейин Азия биринчилигинин тандалма турниринде күч сынашмакчы. Эгер биздин хоккейчилер өз тайпасындагы Индиянын, Сингапурдун жана Макаонун оюнчуларын жеңишсе, Азия чемпионатына катышууга жолдомо алышмакчы.
Хоккей боюнча Кыргызстандын курама командасынын машыктыруучусу Болот Бектемишев: "Сингапур, Индия командасын утса болот. Макао абдан күчтүү команда. Бирок эми биз алардын оюндарын көрүп, изилдеп жатабыз. Экинчи оюнда да көрөбүз. Анан албетте утканга аракет кылабыз."
Дегинкиси, быйылкы сезондо кыргызстандык хоккейчилер жана машыктыруучулар бир катар кызыктуу иш-чараларга күбө болушат. Мисалы, катары ардагер спортчулардан турган кыргыз командасы Сочи олимпиадасынан кийин ушул шаарга барышып, легендарлуу россиялык чеберлер менен бир катар оюндарды өткөрүшөт.
Бөлөкбай Шеримбеков, Чолпонбек Абасов, коомдук биринчи канал, Жумгал району.